ᐱᕙᓪᓕᐊᔪᑦ ᓴᖅᑭᑎᑕᐅᔪᑦ: ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᖃᕆᓴᐅᔭᒃᑯᑦ ᐃᑲᔫᑎᒃᓴᖃᖅᑐᑦ ᐃᖅᑲᓇᐃᔭᕐᕕᖕᒥ ᐊᑦᑕᕐᓇᖅᑐᒦᑦᑐᖃᖁᓇᒍ ᐊᒻᒪᓗ ᐊᐃᑦᑐᖅᑕᐅᔪᖃᖁᓇᒍ ᐸᕐᓇᐅᑎᖏ ᓄᕙᒡᔪᐊᕐᓇᖅ-19

29th Oct 2021

ᔭᓗᓇᐃ, ᓄᓇᑦᓯᐊᖅ (ᐅᒃᑑᐸ 29, 2021) – ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ (WSCC) ᓄᑖᖑᖅᑎᑕᐅᔪᖅ ᐃᑲᔫᑎᒃᓴᖏᑦ ᐊᒻᒪᓗ ᓴᓇᕐᕈᑎᒃᓴᖏᑦ ᐃᖅᑲᓇᐃᔭᖅᑎᑦᑎᔪᑦ ᐊᐃᑦᑐᕐᓗᐃᑕᐃᓕᒪᑎᑦᑎᔾᔪᑎᖏᑦ ᒫᓐᓇᐅᓂᖓᓂ ᐋᓐᓂᐊᓇᖅᑐᖅ ᐊᐃᑦᑐᕐᓗᐃᕙᓪᓕᐊᓪᓗᓂ.

“ᐃᖅᑲᓇᐃᔭᖅᑎᑦᑎᔪᖅ ᐊᒻᒪᓗ ᓴᓇᔨᖏᑦ ᐊᑑᑎᖃᖅᑐᒥᒃ ᐃᓂᖃᖅᑐᑦ ᐊᐃᑦᑐᕐᓗᐃᑦᑕᐃᓕᔾᔪᑎᒃᓴᓄᑦ ᐊᒻᒪᓗ ᓱᒃᑲᐃᑑᓕᖅᓯᒪᑎᓪᓗᒍ ᐊᐃᑦᑐᐃᕙᓪᓕᐊᓂᖓ ᓄᕙᒡᔪᐊᕐᓇᖅ-19. ᑕᒪᕐᒥᒃ ᐱᔅᓂᔅ ᐊᒻᒪᓗ ᐊᐅᓚᑦᓯᔩᑦ ᖃᓂᒡᓕᒋᐊᖅᓯᒪᒋᐊᖃᓕᑦᑕᖏᑦ ᒥᐊᓂᕆᔾᔪᑎᑎᒃ ᒫᓐᓇᐅᔪᖅ ᐋᓐᓂᐊᖃᖅᑕᐃᓕᑎᑦᑎᔨᒃᑯᓂᑦ ᐊᑐᖁᔭᐅᔪᑦ ᑕᐃᒪᓐᓇᐅᔭᕆᐊᖃᖅᑎᑕᐅᔪᓂᒃ ᐊᒻᒪᓗ ᐱᑐᐃᓐᓇᕆᐊᖃᓕᖅᓯᒪᓗᑕ ᖃᓄᑐᐃᓐᓇᖅ ᒪᓕᖁᔭᐅᔪᓂᒃ ᐊᒻᒪᓗ ᑐᑭᒧᐊᒃᑎᑦᑎᔾᔪᑕᐅᔪᓂᒃ ᓄᓇᒥᖕᓄᑦ ᐊᒻᒪᓗ ᑲᒻᐸᓂᐅᔪᓄᑦ. ᐱᓗᐊᖅᑐᒥᒃ ᐱᒻᒪᕆᐅᔪᖅ ᐱᔅᓂᔅ ᕿᒥᕐᕈᐊᑦᑎᐊᕐᓗᑎᒃ ᐊᒻᒪᓗ ᓄᑖᖑᕐᑎᓪᓗᒋᑦ ᐊᑦᑕᕐᓇᖅᑕᐃᓕᑎᑦᑎᔾᔪᑏᑦ ᐸᕐᓇᐅᑎᑦ ᑕᐃᑲᓂ ᐅᓗᕆᐊᓇᖅᑐᖅ ᐋᓐᓂᐊᓇᖅᑐᖅ ᓄᕙᒡᔪᐊᕐᓇᖅ-19 ᓄᓇᑦᓯᓐᓂ ᐅᒡᕙᓘᓐᓃᑦ ᓴᓇᕕᑦᓯᓐᓂ ᐊᐃᑦᑐᖅᑕᐅᕙᓪᓕᐊᑐᐃᓐᓇᖅᑐᑦ”, ᐅᖃᓚᐅᖅᑐᖅ ᑭᐅᓕ ᐃᖕᒍᓚᒻ, ᐊᖓᔪᖅᑳᖅ ᐅᔭᕋᖕᓂᐊᕐᕕᖕᒥ ᐊᒻᒪᓗ ᐃᖅᑲᓇᐃᔭᕐᕕᖕᒥᑦ ᐋᓐᓂᐊᖃᖅᑕᐃᓕᑎᑦᑎᓂᕐᒧᑦ ᐊᒻᒪᓗ ᐊᑦᑕᕐᓇᖅᑐᒦᑕᐃᓕᑎᑦᑎᓂᕐᒧᑦ ᖃᐅᔨᓴᖅᑎ ᓄᓇᑦᓯᐊᕐᒧᑦ ᐊᒻᒪᓗ ᓄᓇᕗᒻᒧᑦ.

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐋᕿᒋᑦᑎᐊᖅᓯᒪᓕᖅᑕᖏᑦ ᐃᑲᔫᑎᑦ ᐊᒻᒪᓗ ᖃᓄᐃᓕᐅᕆᐊᖃᖅᑕᖏᑦ ᐊᑐᐃᓐᓇᐅᔪᑦ ᐃᖅᑲᓇᐃᔭᖅᑎᑦᑎᔨᓄᑦ, ᐅᑯᐊᓗ ᐱᔭᕐᓂᕈᓱᖕᓂᖅᓴᐅᓂᐊᕐᒪᑕ, ᖃᕆᓴᐅᔭᕐᒧᑦ ᐃᓕᓯᒪᔪᓐᓇᖅᑕᖏᑦ, ᐊᒻᒪᓗ ᓱᖏᐅᔾᔭᐅᓂᐊᕐᒪᑕ ᐊᒻᒪᓗ ᐊᑐᖅᑕᐅᓗᑎᒃ ᐊᔾᔨᒌᓐᖏᑦᑐᓂᑦ ᐃᖅᑲᓇᐃᔭᕐᕕᒃ ᐃᓗᖏᓐᓂ. ᐃᑲᔫᑎᑦ ᐊᑐᐃᓐᓇᐅᕗᑦ ᑕᒡᕙᖓᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᖃᕆᓴᐅᔭᖃᕐᕕᖓᓂᑦ ᐃᓚᖃᖅᑐᖅ ᐊᑦᑕᕐᓇᕈᓐᓇᖅᑐᑦ ᐊᒻᒪᓗ ᐅᓗᕆᐊᓇᖅᑐᑦ ᖃᐅᔨᓴᖅᑕᐅᑦᑎᐊᕐᓗᑎᒃ, ᓄᕙᒡᔪᐊᕐᓇᖅ-19 ᐃᖅᑲᓇᐃᔭᕐᕕᑦ ᐃᓗᖏᓐᓂ ᐊᑦᑕᕐᓇᖅᑕᐃᓕᑎᑦᑎᓂᕐᒧᑦ ᐸᕐᓇᐅᑎᑦ ᖃᐅᔨᒋᐊᖅᑕᐅᓗᑎᒃ, ᐃᓂᓕᐅᖅᓯᒪᓗᑎᒃ ᓴᓇᔨᓄᑦ ᐊᒻᒪᓗ ᐃᑲᔪᖅᑕᐅᕙᒃᑐᓄᑦ ᐊᐅᓚᑦᑎᕕᖃᕐᓗᑎᒃ ᖃᐅᔨᓴᕈᑎᓂᒃ, ᐊᒻᒪᓗ ᐊᔾᔨᖑᐊᑦ ᑎᑎᖃᓕᑦ ᐊᒻᒪᓗ ᓇᓗᓇᐃᒃᑯᑎᑦ ᑎᑎᖃᖏᑦ. 

ᑕᒪᐃᓐᓂᒃ ᐱᔭᒃᓴᕆᔭᐅᕗᖅ ᑕᒪᐃᓐᓂᒃ ᐃᖅᑲᓇᐃᔭᖅᑎᑦᑎᔪᓂᑦ ᐊᐅᓚᑦᑎᓗᑎᒃ ᐋᓐᓂᐊᖃᖅᑕᐃᓕᑎᑦᑎᓂᕐᒥ ᐊᒻᒪᓗ ᐊᑦᑕᕐᓇᖅᑐᒦᓕᖅᑐᖃᖁᓇᒍ ᓴᓇᕕᐅᔪᑦ ᐃᓗᐊᓂ. ᐅᓇ ᐃᓚᖃᖅᑐᖅ ᑎᑎᕋᖅᓯᒪᓗᑎᒃ ᓴᕿᔮᖅᑐᑦ ᐸᕐᓇᐅᑎᑦ ᐅᑯᐊᓗ ᑕᑯᑎᑦᑎᓯᒪᔪᑦ ᑕᒪᐃᓐᓂᒃ ᐊᑦᑕᕐᓇᖅᑐᖃᕈᓐᓇᖅᑐᓂᒃ ᐱᑦᑎᐊᓕᔭᕆᐊᓕᖕᓂᒃ ᐊᑦᑎᒃᑑᓂᐊᕐᒪᑦ ᓄᕙᒡᔪᐊᕐᓇᖅ-19 ᖃᓂᒪᓕᕈᑕᐅᖁᓇᒍ ᐊᐃᑦᑐᕐᓗᐃᔪᖃᖁᓇᒍ ᐊᒻᒪᓗ ᓴᓇᔨᑦ, ᐃᑲᔪᖅᑕᐅᔪᑦ, ᐊᒻᒪᓗ ᐱᓕᕆᑎᑦᑎᔨᐅᔪᑦ ᐊᑦᑕᕐᓇᖅᑐᒦᓕᖁᓇᒋᑦ. 

ᑕᒡᕙᐅᕗᖅ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᖃᐅᔨᓴᖅᑎᒻᒪᕆᖓᑦ ᐃᑲᔪᕐᓂᐊᖅᑐᖅ ᐱᔭᕇᖅᓯᓂᐊᕋᑦᓯ ᐅᒡᕙᓘᓐᓃᑦ ᐋᕿᒋᐊᑦᑎᐊᑲᓐᓂᕐᓗᒋᑦ ᓴᓇᕕᖕᓂ ᐃᓗᐊᓂ ᐊᑦᑕᕐᓇᖅᑕᐃᓕᑎᑦᑎᔾᔪᑎᑦ ᐸᕐᓇᐅᑎᑦ, ᐊᑏ ᖃᕆᓴᐅᔭᒃᑯᑦ ᑎᑎᕋᕐᓗᑎᒃ Covid-19@wscc.nt.ca ᐅᒡᕙᓘᓐᓃᑦ Covid-19@wscc.nu.ca.

-30-

ᒫᒋ ᑳᓕᓐᔅ
ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐊᐅᓚᑦᑎᔨ
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᓄᓇᑦᓯᐊᕐᒥ ᐊᒻᒪᓗ ᓄᓇᕗᒻᒥ
ᐅᖄᓚᐅᑦ: (867) 920-3854