ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐱᔨᑦᑎᕋᐅᑎᖏᓐᓄᑦ ᓄᑖᖑᓛᑦ

ᑕᒪᕐᒥ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᕐᑏᑦ ᑎᑎᕋᕐᕕᖏᑦ ᒪᑐᐃᖓᔪᑦ  ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐊᒻᒪ ᐊᑦᑕᓇᔾᔭᐃᖅᓯᒪᓂᕐᒥᒃ ᐱᓕᕆᐊᓂᒃ ᐊᑐᖅᖢᑎᒃ. ᐱᔨᑦᑎᕋᖅᑕᐅᕙᒃᑐᑦ ᐃᓂᒃᓴᓕᐅᖅᐸᒌᖅᐸᒡᓗᑎᒃ ᐅᐸᓚᐅᙱᓐᓂᖏᓐᓂᒃ. ᑕᑯᒋᐊᕐᓗᒍ ᓄᕙᒡᔪᐊᕐᓇᖅ-19-ᒧᑦ ᒪᒃᐱᒐᖅ ᐱᔨᑦᑎᕋᐅᑎᓄᑦ ᐱᒻᒪᕆᖕᓂ ᑕᑯᔪᓐᓇᕐᓂᐊᕋᕕᑦ ᓄᑖᖑᓛᓂᒃ, ᐊᒻᒪᓗ ᓄᕙᒡᔪᐊᕐᓇᖅ-19 ᐃᑲᔫᑎᒃᓴᓄᑦ ᒪᒃᐱᒐᖅ ᐃᖅᑲᓇᐃᔭᕐᕕᖕᓄ ᐃᑲᔫᑎᐅᔪᓐᓇᖅᑐᓄᑦ.

ᐱᕙᓪᓕᐊᔪᑦ ᓴᖅᑭᑎᑕᐅᔪᑦ: ᐊᐃᕐᕆᓕ 28 ᑲᓇᑕᒥ ᐅᓪᓗᖓ ᕿᔅᓵᖕᓂᖅᒧᑦ

27th Apr 2021

ᐃᖃᓗᐃᑦ, ᓄᓇᕗᑦ (ᐊᐃᕐᕆᓕ 27, 2021) – ᑲᓇᑕᒥ ᐅᓪᓗᖓ ᕿᔅᓵᖕᓂᖅᒧᑦ, ᓇᓗᓇᐃᖅᑕᐅᓯᒪᕙᒃᑐᖅ ᐊᕐᕌᒍᑕᒫᓐ ᐊᐃᕐᕆᓕ 28-ᒥᑦ, ᐋᖅᑭᒃᓯᒪᔪᖅ ᐃᖅᑲᐅᒪᔾᔪᑎᒋᓪᓗᒍ ᐃᓅᔪᓐᓃᖅᓯᒪᔪᓂᒃ, ᐋᓐᓂᐊᖅᔪᐊᖅᑐᓂᒃ ᐅᕝᕙᓘᓐᓃᑦ ᐋᓐᓂᖅᑐᕕᓂᕐᓂᒃ ᐋᓐᓂᐊᖅᑖᕐᓂᑯᓂᓪᓘᓐᓃᑦ ᐃᖅᑲᓇᐃᔮᖏᓐᓄᑦ.

“ᐊᕐᕌᒍᑕᒫᓐ ᐊᐃᕐᕆᓕ 28-ᒥᑦ, ᐃᖅᑲᐅᒪᖃᑦᑕᕋᑦᑕ ᑕᒪᐃᓐᓂᖅ ᐃᓅᔪᓐᓃᖅᑐᕕᓂᕐᓂᒃ ᐃᖅᑲᓇᐃᔭᖅᖢᑎᒃ ᐊᒻᒪᓗ ᐱᓂᐊᖅᓂᕋᖅᐸᒃᖢᑕ ᖃᓄᑐᐃᓐᓇᖅ ᐱᓕᕆᓂᐊᕐᓂᕋᖅᖢᑕ ᐃᖅᑲᓇᐃᔭᖅᕕᖕᒥ ᐋᓐᓂᖁᔨᙱᖢᑕ ᓯᕗᓂᑦᑎᓐᓂᒃ. ᒫᓐᓇᓂ, ᑕᐃᒪᖓᓕᒫᓂᒃ, ᑕᒪᑦᑕ ᐊᑐᓂ ᖃᐅᔨᒪᔭᕆᐊᖃᓕᕋᑦᑕ ᖃᐅᔨᔪᓐᓇᖅᓯᓂᖅᒥᒃ ᐋᓐᓂᐊᖃᖅᑕᐃᓕᓂᖅᒧᑦ ᐊᒻᒪ ᐱᕐᕈᓗᐊᕿᑦᑕᐃᓕᑎᑦᑎᓂᖅᒧᑦ ᐅᓗᕆᐊᓇᕋᔭᖅᑐᓂᒃ ᐊᒻᒪᓗ ᑐᑭᓯᑎᑦᑎᓯᒪᓗᑕ ᐱᔪᓐᓇᐅᑎᑦᑎᓐᓂᒃ ᐊᒻᒪ ᑲᒪᒋᔭᒃᓴᑦᑎᓐᓂᒃ ᒪᑯᐊ ᐃᖅᑲᓇᐃᔭᖅᕖᑦ ᐅᓗᕆᐊᓇᙱᓐᓂᖅᓴᐅᓇᓱᒃᖢᒋᑦ,” ᐅᖃᖅᑐᖅ ᓂᕐᓱᖅᓇᖅᑐᖅ ᔪᐊᔾ ᕼᐃᒃᔅ, ᒥᓂᔅᑕ ᑲᒪᒋᔭᖃᖅᑐᖅ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ (WSCC) ᓄᓇᕗᒥᑦ.

“ᐅᑯᓄᖓᓕ ᐅᑭᐅᕐᑕᖅᑐᕐᒥ ᑲᑐᔾᔨᖃᑎᒌᑦ ᐃᖅᑲᓇᐃᔭᕐᓂᕐᒧᑦ ᐊᒻᒪᓗ ᐃᖅᑲᓇᐃᔭᖅᑎᓄᑦ ᑭᒡᒐᖅᑐᖅᑕᑦᑎᓐᓄᑦ, ᐊᐃᕐᕆᓕ 28, ᐅᓪᓗᖅ ᕿᔅᓵᖕᓂᖅᒧᑦ ᐅᕙᑦᑎᓐᓄᑦ ᐃᒃᐱᒋᒍᑎᐅᓐᓇᖅᑐᖅ ᐊᑕᐅᑦᑎᒃᑯᑦ ᐃᓱᒪᒋᔭᖃᖅᑎᓪᓗᑕ. ᐅᓪᓗᒥ, ᐊᑕᐅᑦᑎᒃᑯᑦ ᐃᓱᒪᒋᔭᖃᖅᑐᒍᑦ. ᐅᕙᑦᑎᓐᓄᑦᑕᐅᖅ ᐊᓯᑦᑎᓐᓄᓪᓗ ᐱᓇᓱᒋᐊᖃᕐᒥᒐᑦᑕ – ᐃᖅᑲᓇᐃᔭᖅᕕᖕᓂᒃ ᖁᐊᕐᓵᕐᓇᕈᓐᓃᖅᑎᑦᑎᓯᒪᓗᑕ ᐊᒻᒪ ᑲᒪᒋᓪᓚᕆᒍᓐᓇᕐᓗᒋᑦ. ᐅᓪᓗᒥᑐᐊᖑᙱᑦᑐᖅ, ᑭᓯᐊᓂᓕ ᖃᐅᑕᒫ”, ᐅᖃᖅᑐᖅ ᓂᑰᓪ ᑑᔅ, ᐅᑭᐅᕐᑕᖅᑐᕐᒥ ᑲᑐᔾᔨᖃᑎᒌᑦ ᐃᖅᑲᓇᐃᔭᕐᓂᕐᒧᑦ (NTFL).

ᐅᕙᑦᑎᓐᓂᒃ ᐃᓚᐅᔪᓐᓇᖅᑐᓯ ᓇᓂᑐᐃᓐᓈᕋᓗᐊᕈᔅᓯ ᓂᐱᖃᙱᓚᐅᑲᖕᓂᒃᑯᑦ ᐊᐃᕐᕆᓕ 28-ᒥᑦ. ᐃᓱᒪᒋᓗᒍ ᑲᓇᑕᒥ ᐅᓪᓗᖓ ᕿᔅᓵᖕᓂᖅᒧᑦ ᐃᖅᑲᓇᐃᔭᖅᕕᒋᔭᕐᓂᒃ ᐊᑭᓐᓇᖅᒥᑦ ᐃᓕᓯᓯᒪᓗᑎᒃ ᕿᒡᓵᖕᓂᖅᒧᑦ ᐅᓪᓗᖅᒧᑦ ᐊᔾᔨᙳᐊᒥᑦ ᐅᕝᕙᓘᓐᓃᑦ ᐃᑲᔪᖅᑐᐃᓯᒪᓃᑦ ᓴᖅᑭᔮᖅᓗᒍ ᑐᓴᐅᒪᔾᔪᑎᓕᕆᓂᒃᑯᑦ ᐊᑐᕐᓗᑎᒃ ᐃᓚᐅᔾᔪᑎᒥᒃ ᐆᒥᖓ #dayofmourning. 

ᐃᖅᑲᐅᒪᒋᑦ ᐅᔾᔨᕈᓱᑦᑎᐊᕐᓂᖅ ᐃᖅᑲᓇᐃᔭᖅᕕᒃ ᖁᐊᖅᓵᖅᓇᑕᐃᓕᒪᓪᓗᒍ ᐃᓅᓯᕐᓂᒃ ᖃᓄᐃᑎᑦᑎᙱᑦᑐᓐᓇᖅᑐᖅ.


-30-

ᒫᒋ ᑳᓕᓐᔅ
ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐊᐅᓚᑦᑎᔨ
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᓄᓇᑦᓯᐊᕐᒥ ᐊᒻᒪᓗ ᓄᓇᕗᒻᒥ
ᐅᖄᓚᐅᑦ: (867) 920-3854