ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐱᔨᑦᑎᕋᐅᑎᖏᓐᓄᑦ ᓄᑖᖑᓛᑦ

ᑕᒪᕐᒥ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᕐᑏᑦ ᑎᑎᕋᕐᕕᖏᑦ ᒪᑐᐃᖓᔪᑦ  ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐊᒻᒪ ᐊᑦᑕᓇᔾᔭᐃᖅᓯᒪᓂᕐᒥᒃ ᐱᓕᕆᐊᓂᒃ ᐊᑐᖅᖢᑎᒃ. ᐱᔨᑦᑎᕋᖅᑕᐅᕙᒃᑐᑦ ᐃᓂᒃᓴᓕᐅᖅᐸᒌᖅᐸᒡᓗᑎᒃ ᐅᐸᓚᐅᙱᓐᓂᖏᓐᓂᒃ. ᑕᑯᒋᐊᕐᓗᒍ ᓄᕙᒡᔪᐊᕐᓇᖅ-19-ᒧᑦ ᒪᒃᐱᒐᖅ ᐱᔨᑦᑎᕋᐅᑎᓄᑦ ᐱᒻᒪᕆᖕᓂ ᑕᑯᔪᓐᓇᕐᓂᐊᕋᕕᑦ ᓄᑖᖑᓛᓂᒃ, ᐊᒻᒪᓗ ᓄᕙᒡᔪᐊᕐᓇᖅ-19 ᐃᑲᔫᑎᒃᓴᓄᑦ ᒪᒃᐱᒐᖅ ᐃᖅᑲᓇᐃᔭᕐᕕᖕᓄ ᐃᑲᔫᑎᐅᔪᓐᓇᖅᑐᓄᑦ.

ᐱᕙᓪᓕᐊᔪᑦ ᓴᖅᑭᑎᑕᐅᔪᑦ: ᐹᕙᓐᓛᓐ ᓴᕕᒃᓴᕐᓯᐅᕐᑎᑦ ᑯᐊᐸᕇᓴᖓᑦ ᐃᖅᑲᖅᑐᐃᔨᒧᑦ ᖃᓄᐃᓕᔭᐅᔪᑦ ᐱᔭᕋᖕᓂᕐᒧᑦ ᐊᑐᖅᖢᑎᒃ ᓄᓇᕘᒥᑦ ᐅᔭᕋᖕᓂᐊᕐᕖᑦ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪᓗ ᐊᑦᑕᕐᓇᖅᑕᐃᓕᓂᕐᒧᑦ ᐱᖁᔭᖓᒍᑦ

18th Feb 2021

ᔭᓗᓇᐃᕝ, ᓄᓇᑦᓯᐊᖅ (ᕖᕝᕗᐊᕆ 18, 2021) − ᕖᕝᕗᐊᕆ 15, 2021-ᖑᑎᓪᓗᒍ, ᐹᕙᓐᓛᓐ ᓴᕕᒃᓴᕐᓯᐅᕐᑎᑦ ᑯᐊᐸᕇᓴᖓ ᓄᓇᕗᒻᒥᑦ ᐃᖅᑲᖅᑐᐃᕝᕕᖕᒦᓚᐅᖅᑐᑦ ᐊᒻᒪᓗ ᐃᖅᑲᖅᑐᐃᔨᒧᑦ ᖃᓄᐃᓕᒋᐊᖅᑕᐅᓪᓗᑎᒃ ᐱᕋᔭᖕᓂᕐᒧᑦ ᐊᑐᖅᖢᑎᒃ ᐅᔭᕋᖕᓂᐊᕐᕖᑦ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪᓗ ᐊᑦᑕᕐᓇᖅᑕᐃᓕᓂᕐᒧᑦ ᐱᖁᔭᖓᒍᑦ.

ᐅᔭᕋᖕᓂᐊᕐᕕᒃ ᐸᓯᔭᒃᓴᐅᓂᕋᓚᐅᖅᑐᖅ ᓯᖁᒥᑦᑎᓪᓗᑎᒃ ᐊᕕᒃᑐᖅᓯᒪᔪᖅ 2(2)(a) ᑕᐃᑲᓂ ᐅᔭᕋᖕᓂᐊᕐᕖᑦ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪᓗ ᐊᑦᑕᕐᓇᖅᑕᐃᓕᓂᕐᒧᑦ ᐱᖁᔭᖓᒍᑦ ᐊᒻᒪᓗ ᐱᕋᔭᖕᓂᖅᖢᑎᒃ ᓯᖁᒥᑦᑎᓪᓗᑎᒃ ᑖᔅᓱᒥᖓ ᐊᕕᒃᑐᖅᓯᒪᔪᖅ 39(1)(b) ᑕᐃᑲᓂ ᐅᔭᕋᖕᓂᐊᕐᕖᑦ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪᓗ ᐊᑦᑕᕐᓇᖅᑕᐃᓕᓂᕐᒧᑦ ᐱᖁᔭᖓᒍᑦ.

ᐹᕙᓐᓛᓐ ᓴᕕᒃᓴᕐᓯᐅᕐᑎᑦ ᑯᐊᐸᕇᓴᖓ ᐃᖅᑲᖅᑐᐃᔨᒧᑦ ᖃᓄᐃᓕᔭᐅᒋᐊᓚᐅᖅᑐᑦ ᐊᑭᓖᖁᔭᐅᓪᓗᑎᒃ ᑲᑎᓗᒃᑖᖅᖢᒋᑦ $170,000 (ᐃᓚᐳᓪᓗᑎᒃ 15% ᐱᕋᔭᒃᑕᐅᓯᒪᔪᓄᑦ ᐊᑭᓖᒃᑲᓐᓂᕈᑏᑦ) ᐊᑭᓕᖅᖅᑕᐅᔪᖅ ᐃᖅᑲᓇᐃᔭᖅᑏᑦ ᓴᐳᔾᔭᐅᓯᒪᓂᖏᓐᓄᑦ ᑮᓇᐅᖃᖅᑎᑦᑎᕝᕕᖕᒧᑦ.

ᐃᖅᑲᖅᑐᒐᒃᓴᙳᖅᑎᑕᐅᓂᖅ ᓴᖅᑭᓯᒪᔪᖅ ᑕᐃᑲᙵᑦ ᐱᓂᕐᓗᖕᓂᐅᓚᐅᖅᑐᒥᒃ ᐊᑐᖅᑕᐅᓚᐅᖅᑐᖅ ᑎᓯᐱᕆ 16, 2018−ᖑᑎᓪᓗᒍ ᐃᖅᑲᓇᐃᔭᖅᑎ ᑐᖁᓚᐅᖅᑎᓪᓗᒍ ᐊᖁᖢᓂ ᐅᖁᒪᐃᑦᑐᖅᓯᐅᑎᒥᒃ ᐊᐅᓚᐅᑎᓕᖕᒥᒃ ᑕᐃᑲᓂ ᓄᓘᔮᖕᓂᑦ ᐅᔭᕋᖕᓂᐊᕐᕕᖕᒥᑦ, ᖃᓂᒋᔭᖓᓂᑦ ᕼᐋᒪᓚᖏᑕ ᒥᑦᑎᒪᑕᓕᐅᑉ, ᓄᓇᕘᒥᑦ.

ᐊᖏᖃᑎᒌᒍᑕᐅᔪᖅ ᖃᓄᐃᓪᓚᕆᖕᓂᐅᔪᓄᑦ ᓇᓗᓇᐃᖅᑕᐅᓚᐅᖅᑐᖅ ᑖᓐᓇ ᐱᓂᕐᓗᖕᓂᐅᔪᖅ ᓴᖅᑭᓯᒪᔪᑦ ᑲᑎᖅᓱᖅᒪᔪᓂᒃ ᖃᓄᐃᔾᔪᑕᐅᔪᓐᓇᖅᑐᓂᒃ, ᐃᓚᐅᓪᓗᑎᒃ ᓱᒃᑲᓕᓂᖓ, ᐅᓯᔭᖓᑕ ᐅᖁᒪᐃᓐᓂᖓ, ᑎᓱᖅᑲᐅᑉ ᖃᓄᐃᓕᖓᓂᖓ ᐊᒻᒪᓗ ᐃᓕᓐᓂᐊᑦᑎᐊᖅᓯᒪᙱᓐᓂᖓᓄᑦ ᐊᖁᓐᓂᕐᒥᒃ ᐅᓯᔪᒥᒃ ᐊᐅᓚᐅᑎᓕᖕᒧᑦ ᒫᓐᓇᐅᔪᖅ ᖃᓄᐃᓕᖓᓂᐅᔪᓂᑦ ᐅᔭᕋᖕᓂᐊᕐᕕᖕᒥᑦ. ᐃᓕᓐᓂᐊᕐᓂᖅ ᐃᓚᐅᖃᓯᐅᔾᔨᔭᕆᐊᖃᓚᐅᖅᑐᖅ ᐊᑐᖅᑕᐅᔭᕆᐊᖃᖅᑐᓂᒃ ᐊᐅᓚᑦᑎᓂᕐᒧᑦ ᐊᐅᓚᐅᑎᓕᖕᒥᒃ ᖃᓄᐃᑦᑐᓪᓚᕆᐅᑎᓪᓗᒍ ᖃᓄᐃᓕᖓᓂᖓ ᐅᔭᕋᖕᓂᐊᕐᕕᖕᒥᑦ.

ᐱᐊᓂᓚᐅᖅᑎᓪᓗᒍ ᐱᓂᕐᓗᖕᓂᐅᔪᖅ, ᐊᑕᖏᖅᖢᒋᑦ ᐅᔭᕋᖕᓂᐊᕐᕕᖕᒥᑦ ᐊᐅᓚᓃᑦ ᓄᖅᑲᖅᑎᑕᐅᑲᐅᑎᒋᓚᐅᖅᑐᑦ ᐊᒻᒪᓗ ᐅᖃᐅᓯᐅᓪᓗᓂ ᐸᓖᓯᒃᑯᓐᓄᑦ ᐊᒻᒪᓗ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ. ᐹᕙᓐᓛᓐᑯᑦ ᐱᓕᕆᖃᑎᖃᑦᑎᐊᓚᐅᖅᑐᑦ ᖃᐅᔨᓴᕐᓂᕐᒥᒃ ᐊᒻᒪᓗ ᐊᑐᓕᖅᑎᑦᑎᑲᐅᑎᒋᓪᓗᑎᒃ ᐊᒥᓱᒐᓚᖕᓂᒃ ᑎᓕᓯᔾᔪᑕᐅᓚᐅᑲᒃᑐᓂᒃ ᐊᑐᖅᑕᐅᖏᓐᓇᖅᑐᑦ ᓱᓕ ᒫᓐᓇ ᐊᐅᓚᒋᐊᒃᑲᓐᓂᓚᐅᖅᑎᓪᓗᒍ ᐅᔭᕋᖕᓂᐊᕐᕕᒃ. ᐱᐊᓂᒃᑎᓪᓗᒋ ᐹᕙᓐᓛᓐᑯᑦ ᖃᐅᔨᓴᕐᓂᖏᑦ ᐱᓂᕐᓗᖕᓂᕐᒧᑦ, ᖄᒃᑲᓐᓂᐊᒍᑦ ᐱᐅᓯᐅᕙᖕᓂᐊᖅᑐᑦ ᐱᐅᓯᒋᐊᕆᓂᕐᒧᑦ ᐃᖅᑲᓇᐃᔭᖅᑏᑦ ᐊᑦᑕᕐᓇᖅᑕᐃᓕᒪᖁᓪᓗᒋ ᐃᖅᑲᓇᐃᔭᕐᕕᖕᒥᑦ ᓇᓗᓇᐃᔭᖅᑕᐅᓯᒪᓕᖅᑐᑦ ᐊᒻᒪᓗ ᐊᑐᓕᖅᑎᑕᐅᓯᒪᓕᖅᖢᑎᒃ.

-30-

ᒫᒋ ᑳᓕᓐᔅ
ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐊᐅᓚᑦᑎᔨ
ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᓄᓇᑦᓯᐊᕐᒥ ᐊᒻᒪᓗ ᓄᓇᕗᒻᒥ
ᐅᖄᓚᐅᑦ: (867) 920-3854
ᐃᕐᖐᓐᓈᖅᑕᐅᑖ: Maggie Collins