ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖏᑦ ᑎᒍᒥᐊᖅᑕᖏᓪᓗ

ᐃᖅᑲᓇᐃᔭᖅᑏᑦ ᐱᔪᓐᓇᐅᑎᖏᑦ ᑎᒍᒥᐊᖅᑕᖏᓪᓗ

ᑭᓇᓕᒫᖅ ᐃᖅᑲᓇᐃᔭᖅᑎᐅᔪᖅ ᐱᔪᓐᓇᕐᓂᖃᕐᒪᑦ ᐃᖅᑲᓇᐃᔭᕐᓗᓂ ᐊᑦᑕᕐᓈᕿᓐᓇᖏᑦᑐᒥᒃ ᐃᖅᑲᓇᐃᔭᕐᕕᖃᕐᓗᓂ. ᐱᔭᒃᓴᖃᕆᕗᓪᓗ ᐃᖅᑲᓇᐃᔭᕐᕕᒋᔭᒥᖕᓂᒃ ᑲᐅᔨᒪᒋᐊᕐᓗᑎᒃ ᐊᑦᑕᕐᓇᖅᑐᖃᖏᑦᑎᐊᕋᓗᐊᕐᒪᖔᑕ.

ᐃᖅᑲᓇᐃᔭᖅᑑᑉ ᐱᔪᓐᓇᕐᓂᖏᑦ:

1. ᐱᔪᓐᓇᕐᓂᖃᖅᐳᖅ ᖃᐅᔨᒪᓂᕐᒥᒃ ᐅᓗᕆᐊᓇᕐᓂᕆᔭᐅᔪᓂᒃ ᐃᖅᑲᓇᐃᔭᕐᕕᖕᓂ ᖃᓄᐃᓕᐅᕈᑎᒋᔭᕆᐊᖃᕐᒪᖔᖅᐱᒋᓪᓗ.

  • ᑭᓱᑦ ᐅᓗᕆᐊᓇᖅᑐᑦ ᐱᑕᖃᕐᒪᖔᑕ ᑕᕝᕙᓂ ᐃᖅᑲᓇᐃᔭᕐᕕᖕᒥ?  ᑭᓲᕙᑦ ᐊᑦᑕᕐᓇᖅᑐᒦᑦᑕᐃᓕᓂᕐᒧᑦ ᒪᓕᒃᑕᐅᕙᒃᑐᑦ ᐋᓐᓂᖅᑕᐃᓕᒪᓂᕐᒥᒃ ᐊᕐᓗᓂ? ᓇᓃᑉᐸᓪᓕ ᑐᐊᕕᕐᓇᖅᑐᓕᕆᔾᔪᑏᑦ? ᖃᓄᐃᑦᑑᕙᓪᓕ ᑐᐊᕕᕐᓇᖅᑐᖃᓕᖅᐸᑦ ᒪᓕᒋᐊᓖᑦ? 
  • ᐱᔪᓐᓇᕐᓂᖃᖅᐳᑎᑦ ᖃᐅᔨᒪᖃᑕᐅᓂᕐᒥᒃ ᑭᒡᒍᓯᖏᓐᓂᒃ ᑖᒃᑯᐊ ᐊᐱᖅᑯᑏᑦ ᐱᒋᐊᓚᐅᖏᓐᓂᕐᓂ ᐃᖅᑲᓇᐃᔮᕐᓂᕐᒥᒃ.
  • ᐱᔪᓐᓇᕐᓂᖃᖅᐳᑎᑦ ᖃᐅᔨᒪᓂᕐᒥᒃ ᐃᖅᑲᓇᐃᔭᕐᕕᖕᓂ ᐊᑦᑕᕐᓇᖅᑐᒦᑦᑕᐃᓕᔾᔪᑎᓂᒃ ᑕᒻᒪᖏᑦᑎᐊᖅᑐᒥᒡᓗ.
  • ᑲᒪᔨᒋᔭᐃᑦ ᑐᑭᓯᐅᒪᑎᑦᑎᑦᑎᐊᕆᐊᖃᖅᐳᖅ ᐃᓕᖕᓂᒃ ᖁᐊᖅᓵᕐᓇᕈᓐᓇᖅᑐᓂᒃ ᑕᒪᐃᓐᓂᒃ ᐃᖅᑲᓇᐃᔭᕐᕕᖕᒥ, ᖃᓄᕐᓗ ᑲᒪᒋᔭᕆᐊᖃᕋᔭᕐᓂᖏᓐᓂᒃ.
  • ᐱᔪᓐᓇᐅᑎᖃᖅᐳᑎᑦ ᐱᔭᒃᓴᖃᖅᖢᑎᒡᓗ ᐃᓕᓐᓂᐊᖅᑕᐅᑦᑎᐊᕐᓗᑎᑦ ᐊᐅᓚᑦᑎᓂᕐᒧᑦ ᖃᓄᑐᐃᓐᓇᖅ ᐋᓐᓂᐊᕈᑎᒋᔪᓐᓇᖅᑕᕐᓂᒃ.  

2. ᐱᔪᓐᓇᕐᓂᖃᖅᐳᖅ ᐃᓚᐅᓂᕐᒥᒃ ᐊᑦᑕᕐᓇᕈᓐᓃᖅᑎᓐᓇᓱᐊᕐᓗᒍ ᐃᖅᑲᓇᐃᔭᕐᕕᒋᔭᐃᑦ.

  • ᑕᑯᕕᑦ ᑕᐃᒪᓐᓴᐅᒐᔪᖏᑦᑐᒥᒃ ᐃᖅᑲᓇᐃᔭᕐᕕᖕᓃ? ᐅᖃᐅᓯᕆᔪᒪᔭᖃᖅᐲᑦ ᐃᖅᑲᓇᐃᔭᕐᕕᒋᔭᕕᑦ ᐊᑦᑕᕐᓇᖏᒃᑲᓐᓂᕈᑎᒃᓴᖓᓃᒃ? ᐃᓱᒫᓗᒋᔭᖃᖅᐲᑦ ᐃᖅᑲᓇᐃᔭᖃᑎᕕᑦ ᖃᓄᐃᖏᑦᑎᐊᕆᐊᖃᕐᓂᕆᔭᖓᓂᒃ ᐊᑦᑕᕐᓇᖅᑐᒦᖏᒃᑲᓗᐊᕆᐊᒃᓴᖓᓂᒡᓘ? ᐅᖃᐅᑎᒍᒃ ᑲᒪᔨᒋᔭᐃᑦ. ᐱᔪᓐᓇᕐᓂᖃᖅᐳᑎᑦ ᐃᓚᐅᔪᓐᓇᖅᖢᑎᑦ ᖃᓄᖅᑑᖃᑕᐅᓗᑎᑦ ᐃᖅᑲᓇᐃᔭᕐᕖᑦ ᐊᑦᑕᕐᓇᖅᑐᖃᖁᓇᒍ. 
  • ᒥᑭᔫᑕᐅᓂᕐᓴᓂ ᐃᖅᑲᓇᐃᔭᕐᕕᖕᓂ, ᐱᓕᕆᔨᙳᕈᓐᓇᖅᐳᑎᑦ ᐊᑦᑕᕐᓇᖅᑐᖃᖅᑕᐃᓕᓂᕐᒥᒃ. ᐊᖏᔫᓂᖅᓴᓂ ᐃᖅᑲᓇᐃᔭᕐᕕᖕᓂ, ᐃᓚᒋᔭᐅᓕᕈᓐᓇᖅᐳᑎᑦ (OHS)-ᑯᑦ ᑲᑎᒪᔨᕋᓛᖏᓐᓂ ᐃᖅᑲᓇᐃᔭᖅᑎᓄᑦ ᑭᒡᒐᖅᑐᖅᑎᐅᓕᕐᓗᑎᑦ.

3. ᐱᔪᓐᓇᕐᓂᖃᖅᐳᖅ ᐊᖏᖏᓐᓂᕐᒥᒃ ᐊᑦᑕᕐᓇᑐᐃᓐᓇᕆᐊᓕᖕᒥᒃ ᐱᓕᕆᓂᖅ.

  • ᐱᓕᕆᑦᑕᐃᓕᑦᑎᐊᕆᑦ ᖃᐅᔨᒪᑦᑎᐊᙱᑐᐊᕈᕕᑦ ᐱᔭᕆᐊᓕᖕᒥᒃ ᐊᑦᑕᕐᓇᖏᑦᑐᒃᑯᑦ ᑕᒻᒪᖏᑦᑎᐊᖅᑐᒥᒡᓗ.
  • ᐃᖅᑲᓇᐃᔭᕐᕕᒋᔭᕐᓂ ᐱᓕᕆᐊᕆᔭᕆᐊᖃᖅᑕᕐᓄᑦ ᐊᑦᑕᕐᓇᖅᑐᒧᐊᑐᐃᓐᓇᕆᐊᖃᕈᕕᑦ ᐊᓯᑎᓪᓘᓐᓃᑦ ᐊᑐᖅᑕᐅᒐᔪᖏᑦᑐᒃᑯᑦ ᐊᑦᑕᕐᓇᖅᑐᒧᐊᑐᐃᓐᓇᕆᐊᖃᖅᐸᑕ, ᐱᔪᓐᓇᕐᓂᖃᖅᐳᑎᑦ ᐱᔪᒪᖏᓐᓂᕐᒥᒃ. ᐅᖃᐅᑎᓗᒍ ᑲᒪᔨᒋᔭᐃᑦ.

 

ᐊᑐᒐᒃᓴᐃᑦ ᐱᔪᒪᙱᑎᓪᓗᑎᑦ ᐊᑦᑕᕐᓇᑐᐃᓐᓇᕆᐊᓕᖕᒥᒃ ᐱᓕᕆᓂᕐᒥᒃ:
  • ᐱᒋᐊᕈᑎ 1

    ᓄᖅᑲᐅᑎᓗᒍ ᐱᓕᕆᐊᕆᔭᐃᑦ ᐅᖃᕐᓗᑎᓪᓗ ᑲᒪᔨᒋᔭᕐᓄᑦ.

  • ᐱᒋᐊᕈᑎ 2

    ᖃᐅᔨᓴᖅᑕᐅᓯᑲᐅᑎᒋᔭᕆᐊᖃᖅᐳᑦ ᖃᓄᐃᓐᓂᕆᔭᐃᑦ, ᑲᒪᔨᒋᔭᐃᓪᓗ, ᐃᖅᑲᓇᐃᔭᖃᑎᒋᔭᕐᓂᒡᓗ ᐃᓚᐅᔪᖃᕐᓗᓂ.

  • ᐱᒋᐊᕈᑎ 3

    ᐱᔪᓐᓇᕐᓂᖃᖅᐳᑎᑦ ᐃᖅᑲᓇᐃᔭᖅᑎᑦᑎᔨᖕᓂᙶᖅᑐᒥᒃ, (OHS)-ᑯᓐᓂ ᐃᓚᒋᔭᐅᔪᒥᒃ, ᐅᕝᕙᓘᓐᓃᑦ ᐃᖅᑲᓇᐃᔭᖃᑎᖕᓂᒃ ᐃᓚᐅᖁᔭᕐᓂᒃ ᐱᖃᑎᖃᕈᓐᓇᖅᖢᑎᑦ ᖃᐅᔨᓴᖅᑐᖃᕐᓂᖓᓂ.

  • ᐱᒋᐊᕈᑎ 4

    ᐱᔪᓐᓇᕐᓂᖃᖅᐳᑎᑦ ᖃᐅᔨᓴᖅᑕᐅᔪᓂᒃ ᐊᑦᑕᕐᓇᖏᑦᑐᒦᓪᓗᑎᑦ.

  • ᐱᒋᐊᕈᑎ 5

    ᑲᒪᔨᒋᔭᕕᑦ ᓇᓗᓇᐃᔭᕐᕕᒋᓂᐊᖅᐹᑎᑦ ᖃᐅᔨᓴᖅᑕᐅᓂᐅᔪᖅ ᖃᓄᐃᓕᔭᐅᖕᒪᖔᑦ ᐊᒻᒪ ᖃᓄᐃᓕᐅᕆᐊᖃᕋᔭᕐᒪᖔᖅᐱᑦ ᐋᖅᑭᒐᓱᐊᕐᓗᒍ ᐅᓗᕆᐊᓇᕐᓂᖓ.

  • ᐱᒋᐊᕈᑎ 6

    ᐃᖅᑲᓇᐃᔭᕐᕕᖕᓄᑦ ᐅᑎᕐᓗᑎᑦ.

  • ᐱᒋᐊᕈᑎ 7

    ᐅᒃᐱᕆᔭᖃᕈᕕᑦ ᑕᐃᓐᓇ ᐊᑐᒐᔪᖏᑦᑐᖅ ᐅᓗᕆᐊᓇᖅᖢᓂ ᓱᓕ ᑕᐃᒪᐃᒻᒪᖔᑦ, ᑐᓴᖅᑎᒃᑭᑦ (WSCC)-ᑯᑦ ᖃᐅᔨᓴᖅᑕᐅᒃᑲᓐᓂᕈᓐᓇᖁᓪᓗᒍ ᓱᓕ.

ᐃᖅᑲᓇᐃᔭᖅᑎᐅᑉ ᑎᒍᒥᐊᖅᑕᖏᑦ: 

ᐃᓕᓐᓂᐊᕆᐊᒃᑲᓐᓂᕐᓂᖅ ᐃᓕᓐᓂᐊᕐᓂᕐᓗ

ᐃᖅᑲᓇᐃᔭᖅᑎᖁᑎᑎᑦ ᖃᐅᔨᓴᑦᓯᐊᕆᐊᓖᑦ ᖃᐅᔨᒪᒐᓗᐊᕐᒪᖔᖅᐱᑦ ᖃᓄᖅ ᐊᑦᑕᓇᓐᖏᑦᑐᒥᒃ ᑲᒪᒋᒍᓐᓇᕐᒪᖔᖅᐱᐅᒃ ᐃᖅᑲᓇᐃᔮᑦ, ᐃᓕᓐᓂᐊᖅᑎᑦᓯᒋᐊᖃᖅᓱᑎᓪᓗ. ᑐᑭᓯᑎᑦᓯᒋᐊᓖᑦ ᐃᖅᑲᓇᐃᔮᓐᓂ ᑲᒪᒋᒋᐊᓐᓂᒃ ᖃᓄᕐᓗ ᑲᒪᒋᒋᐊᖃᕐᒪᖔᑕ. 

ᑐᑭᓯᑎᑦᓯᒍᓐᓇᕆᐊᓖᑦ ᑕᐅᑐᑦᑎᓪᓗᒍᓗ ᐊᖓᔪᖅᑳᑦ ᖃᓄᖅ ᑲᒪᒋᒋᐊᓕᑎᑦ ᑲᒪᒋᒋᐊᖃᕐᒪᖔᑕ. 

ᓇᓗᒍᕕᑦ, ᐃᓕᓐᓂᐊᖅᑎᑕᐅᒍᒪᒋᐊᖃᖅᑐᑎᑦ

ᐱᒻᒪᕆᐅᕗᖅ ᐃᓘᓐᓇᑦᓯᐊᑎᒃ ᐃᖅᑲᓇᐃᔭᖅᑏᑦ ᑐᑭᓯᓯᒪᒋᐊᓖᑦ ᐃᖅᑲᓇᐃᔮᒥᓂᒃ. ᐃᖅᑲᓇᐃᔭᕐᕖᑦ ᖃᐅᔨᒪᓐᖏᑐᐃᓐᓇᕆᐊᓖᑦ ᐃᓕᓐᓂᐊᑲᓐᓂᕆᐊᖃᕐᓂᕐᓃᕕᑦ. ᐃᓕᓐᓂᐊᑲᓐᓂᕆᐊᖃᕈᕕᑦ ᐅᕝᕙᓗ ᐃᓕᓐᓂᐊᑲᓐᓂᕆᐊᖃᖅᐸᑦ ᐃᖅᑲᓇᐃᔭᖃᑏᑦ ᐊᑦᑕᓇᓐᖏᓂᖅᓴᒦᖁᓪᓗᒍ, ᐅᖃᐅᑎᓯᐅᑉ ᐊᖓᔪᖅᑳᓯ. ᐃᖅᑲᓇᐃᔮᕆᒋᐊᓕᒻᒥ ᑲᒪᑦᑕᐃᓖᑦ ᐃᓕᓐᓂᐊᖅᑎᑕᐅᑦᓯᐊᓚᐅᕐᓇᒃ.

ᒪᓕᓪᓗᒋᑦ ᐊᐅᓚᓂᐅᒋᐊᓖᑦ

ᐃᓕᓐᓂᐊᕐᓗᒋᑦ ᐊᑐᕐᓗᒋᓪᓗ ᐊᑦᑕᓇᑦᑕᐃᓕᓂᕐᒧᑦ ᒪᓕᒐᐃᑦ ᐊᐅᓚᓂᐅᔪᓪᓗ. ᐃᕝᕕᑦ ᑎᒍᒥᐊᖅᑐᑎᑦ ᒪᓕᒋᐊᖃᕐᓂᕐᒥᒃ ᐃᓘᓐᓇᖏᓐᓂᒃ ᐊᐅᓚᓂᐅᔪᓂᒃ ᐊᑦᑕᓇᑦᑕᐃᓕᒪᓂᕐᒧᑦ ᐊᐅᓚᓂᐅᔪᓂᒃ ᐃᖅᑲᓇᐃᔮᓐᓄᑦ. ᐱᖃᓯᐅᑎᑦᓱᑎᒃ ᖃᐅᔨᓴᕐᓂᖅ ᓇᒻᒥᓂᖅ ᓴᐳᔾᔨᒍᑕᐅᔪᑦ (PPE) ᐃᖏᕐᕋᑦᓯᐊᕋᓗᐊᕐᒪᖔᑕ; ᖃᐅᔨᒪᓂᖅ ᖃᓄᖅ ᐊᑐᕆᐊᖃᕐᒪᖔᑕ; ᐊᒻᒪᓗ ᐊᑐᖃᑦᑕᕐᓗᒋᑦ. 

ᕿᒪᑦᑕᐃᓕᐅᑉ ᐃᖅᑲᓇᐃᔭᕐᕖᑦ ᐋᒡᒐᐅᒐᓗᐊᖅ ᓅᖁᑉᐹᑎᑦ ᐃᖅᑲᓇᐃᔭᕐᕕᑉᐱᑦ. ᐊᓯᖏᑦ ᐃᖅᑲᓇᐃᔭᕐᕖᑦ ᐊᑦᑕᓇᖅᑐᖃᑐᐃᓐᓇᕆᐊᓖᑦ ᖃᐅᔨᒪᓐᖏᑕᓐᓂᒃ, ᓲᕐᓗ ᐅᐊᔭᐃᑦ ᐊᐅᒪᓖᑦ, ᖁᐊᔭᕿᓐᓇᖅᑐᑦ ᓇᑏᑦ ᐅᕝᕙᓗ ᓱᕈᓐᓇᖅᑐᐃᑦ. 

ᐅᖃᐅᓯᕆᓗᒋᑦ ᖃᓄᐃᓐᓂᐅᔪᑦ, ᐊᑦᑕᓇᖅᑐᑦ ᖃᓄᐃᓕᖓᓂᐅᔪᑦ ᐊᒻᒪᓗ ᐊᑦᑕᓇᖅᑐᑦ ᐃᖅᑲᓇᐃᔭᕐᓂᒃᑯᑦ ᐱᐅᓯᐅᔪᑦ

ᑕᑯᒍᕕᑦ ᐅᕝᕙᓘᓐᓃᑦ ᖃᓄᐃᑦᑐᖃᖅᐸᑦ, ᐃᖅᑲᓇᐃᔭᕐᕖᑦ ᐊᑦᑕᓇᖅᓯᑉᐸᑕ, ᐅᕝᕙᓗ ᐊᑑᑎᔪᓂᒃ ᑕᑯᒍᕕᑦ ᐊᑦᑕᓇᖅᑐᓂᒃ ᐃᖅᑲᓇᐃᔭᕈᓯᕐᓂᒃ, ᐅᖃᐅᓯᕆᑦᓴᐅᑎᒋᓗᒋᑦ ᐊᖓᔪᖅᑳᓐᓄᑦ. 

ᖃᐅᔨᒪᑦᓯᐊᕆᐊᓕᑎᑦ ᐃᖅᑲᓇᐃᔭᕐᕕᓐᓂ ᑐᐊᕕᕐᓇᖅᑐᖃᓕᖅᐸᑦ ᐸᕐᓇᐅᑏᑦ

ᐃᖅᑲᓇᐃᔭᕐᕕᓕᒫᑦ ᖃᐅᔨᓴᑦᓯᐊᕆᐊᓖᑦ ᑭᓇᒃᑯᓕᒫᑦ ᖃᐅᔨᒪᑦᓯᐊᕋᓗᐊᕐᒪᖔᑕ ᑐᐊᕕᕐᓇᖅᑐᖃᓕᖅᐸᑦ ᖃᓄᐃᒋᐊᖃᕐᓂᕐᒥᒃ; ᖃᑦᑎᕈᑎᐅᑉᐸᑦ, ᐊᐅᒪᐃᑦ ᖃᒥᑉᐸᑕ, ᐊᓯᖏᓐᓂᓘᓐᓃᑦ. ᐃᖅᑲᓇᐃᔭᕐᕖᑦ ᐊᑐᐃᓐᓇᐅᑎᑦᓯᒋᐊᓖᑦ ᑐᐊᕕᕐᓇᖅᑐᓕᕆᓂᕐᒧᑦ ᐸᕐᓇᐅᑎᓂᒃ ᐊᑐᐃᓐᓇᕆᑦᓯᐊᕆᐊᓕᓐᓂᒃ ᐃᓕᓐᓂᕆᓗᒋᓪᓗ.