ᒥᐅᕆᑎᑦ ᐱᔾᔪᑎᒋᔭᖏᓐᓄᑦ

ᒥᐅᕆᑎᑦ ᐱᔾᔪᑎᒋᔭᖏᓐᓄᑦ

ᐅᖓᑖᓄᑦ 100−ᓄ ᐊᕐᕌᒍᐃᑦ ᖄᖏᖅᑐᑦ, ᓲ ᕗᐃᓕᐊᒻ ᒥᐅᕆᑎᑦ ᐅᖃᓪᓚᐅᑎᖃᓚᐅᖅᓯᒪᔪᖅ ᐅᓂᒃᑳᓕᐊᒥᑦ ᐋᓐᑎᐅᕆᐅᑉ ᒪᓕᒐᓕᐅᕐᕕᖓᓂᑦ, ᓴᖅᑭᑎᑦᓯᓂᕐᒥᑦ ᖃᐅᔨᒪᔭᐅᓕᕐᓂᐊᖅᑎᓪᓗᒍ ᒥᐅᕆᑎᑦ ᐱᔾᔪᑎᒋᔭᖏᓐᓄᑦ. ᒥᐅᕆᑎᑦ ᐱᔾᔪᑎᒋᔭᖏᓐᓄᑦ ᑐᙵᕕᖃᖅᑎᑦᓯᔪᖅ WSCC ᐃᖅᑲᓇᐃᔭᖅᑎᓕᒫᓄᑦ ᐃᑲᔫᑎᓕᕆᓂᕐᒧᑦ ᐊᑐᖅᑕᐅᕙᑦᑐᓂᑦ ᑲᓇᑕᒥ. 

ᒥᐅᕆᑎᑦ ᐱᔾᔪᑎᒋᔭᖏᓐᓄᑦ ᓄᑕᐅᖏᓪᓚᖅ ᐊᖏᖃᑎᒌᒍᑕᐅᓯᒪᔪᖅ ᐃᖅᑲᓇᐃᔭᖅᑎᓯᔩᑦ ᑮᓇᐃᔭᐃᑦ ᐃᑲᔫᑎᓕᕆᓂᕐᒧᑦ ᐊᑐᖅᑕᐅᕙᑦᑐᓂᑦ ᐸᓯᔭᐅᒍᓐᓇᖃᑎᒌᑉᐳᓪᓗ ᐋᓐᓂᖅᓯᒪᔪᓄᑦ ᐃᖅᑲᓇᐃᔭᖅᑎᓄᑦ. ᐱᑎᑕᐅᖔᖅᓱᑎᒃ, ᐋᓐᓂᖅᓯᒪᔪᑦ ᐃᖅᑲᓇᐃᔭᖅᑏᑦ ᐱᖃᑦᑕᖅᑐᑦ ᐃᑲᔫᑎᓂᑦ ᒪᒥᓇᓱᐊᖅᑎᓪᓗᒋᑦ, ᓴᒃᑯᐃᑦᓱᑎᒃ ᐱᔪᓐᓇᐅᑎᒥᓂᑦ ᐃᖅᑲᖅᑐᐃᕕᒻᒨᖅᑎᑦᓯᓂᕐᒥᑦ ᐃᖅᑲᓇᐃᔭᖅᑎᑕᐅᕕᒻᒥᓂᑦ. 

ᐃᖅᑲᓇᐃᔭᖅᑎᓄᑦ ᐃᑲᔫᑎᓕᕆᓂᕐᒧᑦ ᐊᑐᖅᑕᐅᕙᑦᑐᖅ ᓄᓇᑦᓯᐊᕐᒥᑦ ᓄᓇᕘᒥᓪᓗ ᐊᑐᕐᓂᖃᓪᓚᕆᑦᑐᖅ ᐃᓅᓯᕐᒧᑦ ᐅᑭᐅᖅᑕᖅᑐᒥᑦ. ᑐᓂᓯᖃᑦᑕᖅᑐᖅ ᐃᓅᖃᑎᒌᒃᐸᓐᓂᕐᒧᑦ ᒪᑭᒪᔾᔪᑎᓄᓪᓗ ᓴᙱᓐᓂᖏᓐᓄᑦ, ᐱᐅᔪᒃᑯᓪᓗ ᐊᑦᑐᐃᓂᖃᖃᑦᑕᖅᑐᖅ ᐊᑐᕐᓂᖓᓄᑦ ᐃᓅᓯᐅᑉ ᐅᑭᐅᖅᑕᖅᑐᒥᑦ ᐃᖅᑲᓇᐃᔭᖅᑎᓄᑦ. 

ᒥᐅᕆᑎᑦ ᐱᔾᔪᑎᒋᔭᖏᓐᓄᑦ:

  1. ᐸᓯᔾᔪᑎᖃᖏᒃᑲᓗᐊᖅᑎᓪᓗᒍ ᐅᑎᖅᑎᑦᓯᕕᐅᒋᐊᓕᓐᓄᑦ: ᐃᖅᑲᓇᐃᔭᖅᑏᑦ ᐊᑭᓕᖅᑕᐅᖃᑦᑕᖅᑐᑦ ᐃᑲᔫᑎᓂᑦ ᐃᓱᒪᒋᓇᒋᑦ ᖃᓄᖅ ᐋᓐᓂᖅᑐᒥᓂᐅᒻᒪᖔᑦ. ᐃᖅᑲᓇᐃᔭᖅᑎ ᐃᖅᑲᓇᐃᔭᖅᑎᓯᔨᓗ ᐱᔾᔪᓐᓇᐅᑎᒋᔭᒥᓂᑦ ᓴᒃᑯᐃᓂᕐᒥᑦ ᐃᖅᑲᖅᑐᐃᕕᒃᑰᖅᑎᑦᓯᓂᕐᒥᑦ. ᐊᐃᕙᓂᖃᖏᓪᓗᑎᒃ ᐱᓕᕆᐊᖑᓚᐅᖅᑐᓂᑦ ᐸᓯᔭᐅᔪᓐᓇᕐᓂᕐᒥᓪᓘᓐᓃᑦ ᐋᓐᓂᓂᕐᒧᑦ.
  2. ᑲᒪᒋᔭᐅᑦᓯᐊᖁᓪᓗᒋᑦ ᐃᑲᔫᑏᑦ: ᑮᓇᐅᔭᐃᑦ ᓴᖅᑭᖅᑕᐅᔪᑦ ᑮᓇᐅᔭᖅᑖᖅᑎᑕᐅᓂᕐᒧᑦ ᐊᖏᖅᑕᐅᔾᔪᑕᐅᓂᕐᒥᑦ ᐱᑕᖃᖅᑐᖅ ᐊᑭᓖᓂᐊᕐᓗᑎᑦ ᐃᑲᔫᑎᓂᑦ ᐃᖅᑲᓇᐃᔭᖅᑎᓄᑦ.
  3. ᑲᑐᔾᔭᐅᓗᓂ ᐸᓯᔭᐅᔪᓐᓇᕐᓂᕐᒧᑦ: ᐃᖅᑲᓇᐃᔭᖅᑎᑦᓯᔨᓕᒫᑦ ᐸᓯᔭᐅᒍᓐᓇᖃᑎᒌᑉᐳᑦ ᐃᖅᑲᓇᐃᔭᕐᕕᒻᒥᑦ ᐋᓐᓂᓂᕐᒧᑦ ᓇᓪᓕᐅᒃᑯᒫᓄᑦ. ᑲᑐᔾᔨᓗᑎᒃ, ᐊᑭᓖᖃᑦᑕᖅᑐᑦ ᐃᑲᔫᑎᓕᕆᓂᕐᒧᑦ ᐊᑐᖅᑕᐅᖃᑦᑕᖅᑐᒥᑦ. ᐃᖅᑲᓇᐃᔭᖅᑎᑦᓯᔨᓕᒫᑦ ᑐᓂᓯᖃᑦᑕᖅᑐᑦ ᑮᓇᐅᔭᐃᔭᕐᕕᐅᔪᒧᑦ. ᑮᓇᐅᔭᓕᕆᓂᕐᒧᑦ ᐸᓯᔭᐅᔪᓐᓇᕐᓂᖅ ᑲᑐᔾᔭᐅᓗᓂ ᑲᒪᒋᔭᖃᕆᐊᖃᖃᑦᑕᖅᑐᑦ.  
  4. ᐃᓛᒃᑰᖓᔪᑦ ᐊᐅᓚᑦᓯᓂᕐᒧᑦ: ᑲᑐᔾᔨᖃᑎᒌᑦ ᐊᐅᓚᑦᓯᓂᐊᖅᑐᑦ ᐃᖅᑲᓇᐃᔭᖅᑎᓄᑦ ᐃᑲᔫᑎᓕᕆᓂᕐᒧᑦ ᓇᓪᓕᐅᒃᑯᒫᓂᑦ ᐱᖃᑕᐅᖏᓪᓚᖅ ᒐᕙᒪᒃᑯᓐᓄᑦ.   
  5. ᐃᓚᒋᔭᐅᖏᓪᓗᑎᒃ ᐊᐅᓚᑦᓯᕕᐅᔪᓂᑦ: ᑭᓯᐊᓂ ᐃᖅᑲᓇᐃᔭᖅᑎᓄᑦ ᐃᑲᔫᑎᓕᕆᓂᕐᒧᑦ ᑲᑐᔾᔨᖃᑎᒌᑦ ᐊᑐᐃᓐᓇᐅᑎᑦᓯᒍᓐᓇᖅᑐᑦ ᐃᖅᑲᓇᐃᔭᖅᑎᓄᑦ ᐃᑲᔫᑎᓕᕆᓂᕐᒧᑦ ᓇᓪᓕᐅᒃᑯᒫᓂᑦ. ᐃᓘᓐᓇᑎᒃ ᐅᑎᖅᑎᑦᓯᕕᐅᓂᕐᒧᑦ ᓇᓗᓇᐃᖅᓯᔪᑦ ᑐᕋᐃᓐᓇᖃᑦᑕᖅᑐᑦ ᐃᑲᔫᑎᓕᕆᓂᕐᒧᑦ ᑲᑎᒪᔨᓄᑦ. ᑲᑎᒪᔩᑦ ᖃᓄᖅᑑᖅᑎᐅᕗᑦ ᑭᖑᓪᓕᖅᐹᒥᓪᓗ ᐱᔪᓐᓇᐅᑎᖃᖅᓱᑎᒃ ᑕᒪᐃᓐᓄᑦ ᐊᑭᓕᕆᐊᓕᓐᓄᑦ.