ᖃᐅᔨᒪᒃᑭᑦ ᐱᔪᓐᓇᐅᑎᑎᑦ

ᖃᐅᔨᒪᒃᑭᑦ ᐱᔪᓐᓇᐅᑎᑎᑦ

ᑭᓇᓕᒫᖅ ᐃᖅᑲᓇᐃᔭᖅᑎᐅᔪᖅ ᐱᔪᓐᓇᕐᓂᖃᕐᒪᑦ ᐃᖅᑲᓇᐃᔭᕐᓗᓂ ᐊᑦᑕᕐᓈᕿᓐᓇᖏᑦᑐᒥᒃ ᐃᖅᑲᓇᐃᔭᕐᕕᖃᕐᓗᓂ. ᐱᔭᒃᓴᖃᕆᕗᓪᓗ ᐃᖅᑲᓇᐃᔭᕐᕕᒋᔭᒥᖕᓂᒃ ᑲᐅᔨᒪᒋᐊᕐᓗᑎᒃ ᐊᑦᑕᕐᓇᖅᑐᖃᖏᑦᑎᐊᕋᓗᐊᕐᒪᖔᑕ.

ᐃᖅᑲᓇᐃᔭᖅᑑᑉ ᐱᔪᓐᓇᕐᓂᖏᑦ:

1. ᐱᔪᓐᓇᕐᓂᖃᖅᐳᖅ ᖃᐅᔨᒪᓂᕐᒥᒃ ᐅᓗᕆᐊᓇᕐᓂᕆᔭᐅᔪᓂᒃ ᐃᖅᑲᓇᐃᔭᕐᕕᖕᓂ ᖃᓄᐃᓕᐅᕈᑎᒋᔭᕆᐊᖃᕐᒪᖔᖅᐱᒋᓪᓗ.

  • ᑭᓱᑦ ᐅᓗᕆᐊᓇᖅᑐᑦ ᐱᑕᖃᕐᒪᖔᑕ ᑕᕝᕙᓂ ᐃᖅᑲᓇᐃᔭᕐᕕᖕᒥ?  ᑭᓲᕙᑦ ᐊᑦᑕᕐᓇᖅᑐᒦᑦᑕᐃᓕᓂᕐᒧᑦ ᒪᓕᒃᑕᐅᕙᒃᑐᑦ ᐋᓐᓂᖅᑕᐃᓕᒪᓂᕐᒥᒃ ᐊᕐᓗᓂ? ᓇᓃᑉᐸᓪᓕ ᑐᐊᕕᕐᓇᖅᑐᓕᕆᔾᔪᑏᑦ? ᖃᓄᐃᑦᑑᕙᓪᓕ ᑐᐊᕕᕐᓇᖅᑐᖃᓕᖅᐸᑦ ᒪᓕᒋᐊᓖᑦ? 
  • ᐱᔪᓐᓇᕐᓂᖃᖅᐳᑎᑦ ᖃᐅᔨᒪᖃᑕᐅᓂᕐᒥᒃ ᑭᒡᒍᓯᖏᓐᓂᒃ ᑖᒃᑯᐊ ᐊᐱᖅᑯᑏᑦ ᐱᒋᐊᓚᐅᖏᓐᓂᕐᓂ ᐃᖅᑲᓇᐃᔮᕐᓂᕐᒥᒃ.
  • ᐱᔪᓐᓇᕐᓂᖃᖅᐳᑎᑦ ᖃᐅᔨᒪᓂᕐᒥᒃ ᐃᖅᑲᓇᐃᔭᕐᕕᖕᓂ ᐊᑦᑕᕐᓇᖅᑐᒦᑦᑕᐃᓕᔾᔪᑎᓂᒃ ᑕᒻᒪᖏᑦᑎᐊᖅᑐᒥᒡᓗ.
  • ᑲᒪᔨᒋᔭᐃᑦ ᑐᑭᓯᐅᒪᑎᑦᑎᑦᑎᐊᕆᐊᖃᖅᐳᖅ ᐃᓕᖕᓂᒃ ᖁᐊᖅᓵᕐᓇᕈᓐᓇᖅᑐᓂᒃ ᑕᒪᐃᓐᓂᒃ ᐃᖅᑲᓇᐃᔭᕐᕕᖕᒥ, ᖃᓄᕐᓗ ᑲᒪᒋᔭᕆᐊᖃᕋᔭᕐᓂᖏᓐᓂᒃ.
  • ᐱᔪᓐᓇᐅᑎᖃᖅᐳᑎᑦ ᐱᔭᒃᓴᖃᖅᖢᑎᒡᓗ ᐃᓕᓐᓂᐊᖅᑕᐅᑦᑎᐊᕐᓗᑎᑦ ᐊᐅᓚᑦᑎᓂᕐᒧᑦ ᖃᓄᑐᐃᓐᓇᖅ ᐋᓐᓂᐊᕈᑎᒋᔪᓐᓇᖅᑕᕐᓂᒃ.  

2. ᐱᔪᓐᓇᕐᓂᖃᖅᐳᖅ ᐃᓚᐅᓂᕐᒥᒃ ᐊᑦᑕᕐᓇᕈᓐᓃᖅᑎᓐᓇᓱᐊᕐᓗᒍ ᐃᖅᑲᓇᐃᔭᕐᕕᒋᔭᐃᑦ.

  • ᑕᑯᕕᑦ ᑕᐃᒪᓐᓴᐅᒐᔪᖏᑦᑐᒥᒃ ᐃᖅᑲᓇᐃᔭᕐᕕᖕᓃ? ᐅᖃᐅᓯᕆᔪᒪᔭᖃᖅᐲᑦ ᐃᖅᑲᓇᐃᔭᕐᕕᒋᔭᕕᑦ ᐊᑦᑕᕐᓇᖏᒃᑲᓐᓂᕈᑎᒃᓴᖓᓃᒃ? ᐃᓱᒫᓗᒋᔭᖃᖅᐲᑦ ᐃᖅᑲᓇᐃᔭᖃᑎᕕᑦ ᖃᓄᐃᖏᑦᑎᐊᕆᐊᖃᕐᓂᕆᔭᖓᓂᒃ ᐊᑦᑕᕐᓇᖅᑐᒦᖏᒃᑲᓗᐊᕆᐊᒃᓴᖓᓂᒡᓘ? ᐅᖃᐅᑎᒍᒃ ᑲᒪᔨᒋᔭᐃᑦ. ᐱᔪᓐᓇᕐᓂᖃᖅᐳᑎᑦ ᐃᓚᐅᔪᓐᓇᖅᖢᑎᑦ ᖃᓄᖅᑑᖃᑕᐅᓗᑎᑦ ᐃᖅᑲᓇᐃᔭᕐᕖᑦ ᐊᑦᑕᕐᓇᖅᑐᖃᖁᓇᒍ. 
  • ᒥᑭᔫᑕᐅᓂᕐᓴᓂ ᐃᖅᑲᓇᐃᔭᕐᕕᖕᓂ, ᐱᓕᕆᔨᙳᕈᓐᓇᖅᐳᑎᑦ ᐊᑦᑕᕐᓇᖅᑐᖃᖅᑕᐃᓕᓂᕐᒥᒃ. ᐊᖏᔫᓂᖅᓴᓂ ᐃᖅᑲᓇᐃᔭᕐᕕᖕᓂ, ᐃᓚᒋᔭᐅᓕᕈᓐᓇᖅᐳᑎᑦ (OHS)-ᑯᑦ ᑲᑎᒪᔨᕋᓛᖏᓐᓂ ᐃᖅᑲᓇᐃᔭᖅᑎᓄᑦ ᑭᒡᒐᖅᑐᖅᑎᐅᓕᕐᓗᑎᑦ.

3. ᐱᔪᓐᓇᕐᓂᖃᖅᐳᖅ ᐊᖏᖏᓐᓂᕐᒥᒃ ᐊᑦᑕᕐᓇᑐᐃᓐᓇᕆᐊᓕᖕᒥᒃ ᐱᓕᕆᓂᖅ.

  • ᐱᓕᕆᑦᑕᐃᓕᑦᑎᐊᕆᑦ ᖃᐅᔨᒪᑦᑎᐊᙱᑐᐊᕈᕕᑦ ᐱᔭᕆᐊᓕᖕᒥᒃ ᐊᑦᑕᕐᓇᖏᑦᑐᒃᑯᑦ ᑕᒻᒪᖏᑦᑎᐊᖅᑐᒥᒡᓗ.
  • ᐃᖅᑲᓇᐃᔭᕐᕕᒋᔭᕐᓂ ᐱᓕᕆᐊᕆᔭᕆᐊᖃᖅᑕᕐᓄᑦ ᐊᑦᑕᕐᓇᖅᑐᒧᐊᑐᐃᓐᓇᕆᐊᖃᕈᕕᑦ ᐊᓯᑎᓪᓘᓐᓃᑦ ᐊᑐᖅᑕᐅᒐᔪᖏᑦᑐᒃᑯᑦ ᐊᑦᑕᕐᓇᖅᑐᒧᐊᑐᐃᓐᓇᕆᐊᖃᖅᐸᑕ, ᐱᔪᓐᓇᕐᓂᖃᖅᐳᑎᑦ ᐱᔪᒪᖏᓐᓂᕐᒥᒃ. ᐅᖃᐅᑎᓗᒍ ᑲᒪᔨᒋᔭᐃᑦ.

 

ᐊᑐᒐᒃᓴᐃᑦ ᐱᔪᒪᙱᑎᓪᓗᑎᑦ ᐊᑦᑕᕐᓇᑐᐃᓐᓇᕆᐊᓕᖕᒥᒃ ᐱᓕᕆᓂᕐᒥᒃ:
  • ᐱᒋᐊᕈᑎ 1

    ᓄᖅᑲᐅᑎᓗᒍ ᐱᓕᕆᐊᕆᔭᐃᑦ ᐅᖃᕐᓗᑎᓪᓗ ᑲᒪᔨᒋᔭᕐᓄᑦ.

  • ᐱᒋᐊᕈᑎ 2

    ᖃᐅᔨᓴᖅᑕᐅᓯᑲᐅᑎᒋᔭᕆᐊᖃᖅᐳᑦ ᖃᓄᐃᓐᓂᕆᔭᐃᑦ, ᑲᒪᔨᒋᔭᐃᓪᓗ, ᐃᖅᑲᓇᐃᔭᖃᑎᒋᔭᕐᓂᒡᓗ ᐃᓚᐅᔪᖃᕐᓗᓂ.

  • ᐱᒋᐊᕈᑎ 3

    ᐱᔪᓐᓇᕐᓂᖃᖅᐳᑎᑦ ᐃᖅᑲᓇᐃᔭᖅᑎᑦᑎᔨᖕᓂᙶᖅᑐᒥᒃ, (OHS)-ᑯᓐᓂ ᐃᓚᒋᔭᐅᔪᒥᒃ, ᐅᕝᕙᓘᓐᓃᑦ ᐃᖅᑲᓇᐃᔭᖃᑎᖕᓂᒃ ᐃᓚᐅᖁᔭᕐᓂᒃ ᐱᖃᑎᖃᕈᓐᓇᖅᖢᑎᑦ ᖃᐅᔨᓴᖅᑐᖃᕐᓂᖓᓂ.

  • ᐱᒋᐊᕈᑎ 4

    ᐱᔪᓐᓇᕐᓂᖃᖅᐳᑎᑦ ᖃᐅᔨᓴᖅᑕᐅᔪᓂᒃ ᐊᑦᑕᕐᓇᖏᑦᑐᒦᓪᓗᑎᑦ.

  • ᐱᒋᐊᕈᑎ 5

    ᑲᒪᔨᒋᔭᕕᑦ ᓇᓗᓇᐃᔭᕐᕕᒋᓂᐊᖅᐹᑎᑦ ᖃᐅᔨᓴᖅᑕᐅᓂᐅᔪᖅ ᖃᓄᐃᓕᔭᐅᖕᒪᖔᑦ ᐊᒻᒪ ᖃᓄᐃᓕᐅᕆᐊᖃᕋᔭᕐᒪᖔᖅᐱᑦ ᐋᖅᑭᒐᓱᐊᕐᓗᒍ ᐅᓗᕆᐊᓇᕐᓂᖓ.

  • ᐱᒋᐊᕈᑎ 6

    ᐃᖅᑲᓇᐃᔭᕐᕕᖕᓄᑦ ᐅᑎᕐᓗᑎᑦ.

  • ᐱᒋᐊᕈᑎ 7

    ᐅᒃᐱᕆᔭᖃᕈᕕᑦ ᑕᐃᓐᓇ ᐊᑐᒐᔪᖏᑦᑐᖅ ᐅᓗᕆᐊᓇᖅᖢᓂ ᓱᓕ ᑕᐃᒪᐃᒻᒪᖔᑦ, ᑐᓴᖅᑎᒃᑭᑦ (WSCC)-ᑯᑦ ᖃᐅᔨᓴᖅᑕᐅᒃᑲᓐᓂᕈᓐᓇᖁᓪᓗᒍ ᓱᓕ.

ᐃᖅᑲᓇᐃᔭᖅᑎᒧᑦ ᐱᓕᕆᐊᒃᓴᐃᑦ:

ᐱᓕᒻᒪᒃᓴᕐᓂᖅ ᐃᓕᓐᓂᐊᕐᓂᕐᓗ

ᐃᖅᑲᓇᐃᔭᖅᑎᑦᑎᔨᒋᔭᐃᑦ ᖃᐅᔨᓇᓱᐊᖅᓯᒪᑦᑎᐊᕆᐊᖃᖅᐳᖅ ᐱᔪᓐᓇᑦᑎᐊᕋᓗᐊᕐᒪᖔᖅᐱᑦ ᐃᖅᑲᓇᐃᔮᕐᓂ ᐊᑦᑕᕐᓇᖅᑐᒦᑦᑕᐃᓕᒪᓂᕐᒥᒃ, ᐊᒻᒪ ᐱᓕᒻᒪᒃᓴᑦᑎᐊᖅᓯᒪᓂᕐᒥᒃ. ᐅᓂᒃᑳᑦᑎᐊᕆᐊᖃᖅᐸᒃᐳᑦ ᐃᖅᑲᓇᐃᔮᕐᓂ ᐱᓕᕆᐊᕆᔭᕆᐊᖃᖅᑕᕐᓂᒃ ᐊᔪᕆᖅᓲᔾᔭᐅᓗᑎᓪᓗ ᖃᓄᐃᓕᐅᕆᐊᖃᕐᒪᖔᖅᐱᑦ. 

ᓇᓗᔪᓐᓃᕆᐊᖃᖅᐳᑎᓪᓗ ᐅᓂᒃᑲᐅᓯᕆᓗᒍ ᐊᔪᕆᖅᓲᑎᓗᒍᓗ ᐱᔭᕆᐊᖃᖅᑕᕐᓂᒃ ᑲᒪᔨᒋᔭᐃᑦ.

ᑐᑭᓯᑦᑎᐊᕐᓂᖏᒃᑯᕕᑦ, ᐃᓕᓐᓂᐊᖅᑎᑕᐅᔪᒪᓗᑎᑦ

ᑐᑭᓯᔭᕆᐊᖃᓪᓚᕆᒃᐳᑦ ᐃᖅᑲᓇᐃᔭᖅᑎᓕᒫᑦ ᐱᓕᕆᐊᒃᓴᖏᓐᓂᒃ. ᐃᖅᑲᓇᐃᔭᖅᑎᑦᑎᔨᕕᑦ ᖃᐅᔨᒪᖏᑐᐃ ᓐᓇᕆᐊᓕᒃ ᐃᓕᓐᓂᐊᕆᐊᖃᖅᑐᑎᑦ. ᐅᒃᐱᒍᕕᐅᒃ ᐅᕝᕙᓘᓐᓃᑦ ᑭᓇᓗᑭᐊ ᐃᖅᑲᓇᐃᔭᖃᑎᒋᔭᑦ ᐃᓕᓐᓂᐊᒃᑲᓂᕆᐊᖃᖅᑐᖅ ᐃᖅᑲᓇᐃᔮᖓᓄᑦ ᐊᑦᑕᕐᓇᖅᑐᒥᖁᓇᒍ, ᑲᒪᔨᑦ ᐅᖃᐅᑎᓪᓗᒍ. ᐱᓕᕆᐊᖃᖏᓪᓗᑎᑦ ᑭᓯᐊᓂ ᐃᓕᓐᓂᐊᖅᑎᑕᐅᓯᒪᑦᑎᐊᕐᓂᕈᕕᑦ. 

ᒪᓕᒡᓗᒋᑦ ᒪᓕᒃᑕᐅᔭᕆᐊᓖᑦ 

ᖃᐅᔨᑦᑎᐊᕐᓗᒋᑦ ᐊᑦᑕᕐᓈᕿᑦᑕᐃᓕᒪᓂᕐᒧᑦ ᒪᓕᒋᐊᓖᑦ ᐊᑐᖅᑕᐅᔭᕆᐊᓖᓪᓗ. ᐃᕝᕕᑦ ᐱᓂᐊᒐᒃᓴᖃᖅᐳᑎᑦ ᒪᓕᑦᑎᐊᕐᓂᕐᒥᒃ ᑕᒪᐃᓐᓂᒃ ᐊᑦᑕᕐᓇᖅᑕᐃᓕᒪᓂᕐᒧᑦ ᒪᓕᒋᐊᓕᖕᓂᒃ ᐊᑐᐊᒐᕐᓂᒡᓗ ᐊᑐᕆᐊᓕᖕᓂᒃ ᐃᖅᑲᓇᐃᔮᕐᓂ. ᑖᓐᓇ ᐃᓚᐅᒋᕗᖅ ᐱᔭᒃᓴᓂ ᖃᐅᔨᓴᕐᓂᖅ ᓇᖕᒥᓂᖅ ᐃᓕᖕᓂᒃ ᓴᐳᑎᓇᓱᐊᕈᑎᒋᓇᔭᖅᑕᑎᑦ ᐊᔪᖏᑦᑎᐊᕋᓗᐊᕐᒪᖔᑕ (PPE)-ᖑᓂᕋᖅᑕᐅᔪᑦ ᖃᐅᔨᓴᕐᓗᒋᑦ, ᖃᓄᕐᓗ ᐊᑐᕆᐊᖃᕐᒪᖔᖅᐱᒋᑦ ᖃᐅᔨᒪᓗᑎᑦ, ᐊᑐᕆᐊᖃᓕᕈᕕᒋᓪᓗ ᐊᑐᕐᓗᒋᑦ. 

ᕿᒪᒃᓯᑦᑕᐃᓕᒋᑦ ᐃᖅᑲᓇᐃᔭᕐᕕᖕᓂᒃ ᑭᓯᐊᓂ ᑲᒪᔨᕕᑦ ᐱᖁᓕᕐᐹᑎᑦ. ᐃᖅᑲᓇᐃᔭᕐᕕᐅᑉ ᐊᓯᖏᑦ ᐅᓗᕆᐊᓇᑐᐃᓐᓇᕆᐊᖃᕐᒪᑕ ᖃᐅᔨᒪᙱᑕᑎᑦ, ᓲᕐᓗ ᐆᒻᒪᖅᑯᑎᓄᑦ ᐊᖅᑯᑏᑦ, ᖁᐊᑦᑖᕐᓇᖅᑐᑦ ᐱᓱᒡᕖᑦ, ᐅᕝᕙᓘᓐᓃᑦ ᑐᖁᓐᓇᖅᑐᖅᑕᖃᖅᑐᑦ.

ᐅᖃᐅᓯᕆᓗᒋᑦ ᖃᓄᐃᓕᓂᐅᔪᑦ, ᖁᐊᖅᓵᕐᓇᑐᐃᓐᓇᕆᐊᓖᑦ, ᐅᓗᕆᐊᓈᕿᔪᓪᓗ ᐃᖅᑲᓇᐃᔭᕐᕕᖕᒥ

ᑕᑯᒍᕕᑦ ᐅᕝᕙᓘᓐᓃᑦ ᖃᓄᐃᓪᓕᑳᓪᓚᒃᑯᕕᑦ, ᐃᖅᑲᓇᐃᔭᕐᕖᓪᓗ ᖁᐊᖅᓵᕐᓇᑐᐃᓐᓇᕆᐊᖃᓕᕐᓗᓂ ᐃᖅᑲᓇᐃᔭᕐᕕᒋᔭᕆᐊᒃᓴᖅ, ᐅᕝᕙᓘᓐᓃᑦ ᖃᐅᔨᒍᕕᑦ ᐊᑦᑕᕐᓈᕿᑐᐃᓐᓇᕆᐊᓕᖕᓂᒃ ᐊᑐᖅᑕᐅᔪᓂᒃ, ᐅᖃᐅᓯᕆᑲᐅᑎᒋᓗᒋᑦ ᑲᒪᔨᒋᔭᕐᓄᑦ ᐃᕐᖐᓐᓇᖅ.

ᖃᐅᔨᒪᓗᑎᑦ ᐃᖅᑲᓇᐃᔭᕐᕕᖕᓂ ᑐᐊᕕᕐᓇᖅᑐᖅᓯᐅᑎᓂᒃ ᐸᕐᓇᒃᑕᐅᓯᒪᔪᓂᒃ

ᐃᖅᑲᓇᐃᔭᖅᑎᑦᑎᔩᑦ ᑐᑭᓯᐅᒪᑎᑦᑎᔭᕆᐊᖃᖅᐳᑦ ᐃᖅᑲᓇᐃᔭᖅᑎᓕᒫᓂᒃ ᖃᓄᐃᓕᐅᕆᐊᖃᓕᕋᔭᕐᒪᖔᑕ ᑐᐊᕕᕐᓇᖅᑐᖃᓕᖅᐸᑦ; wᖁᖁᐊᕈᑎᐅᒃᐸᓪᓘᓐᓃᑦ, ᐆᒻᒪᖅᑯᑎᑦ ᖃᒥᑉᐸᑕᓘᓐᓃᑦ, ᐅᕝᕙᓘᓐᓃᑦ ᐊᓯᖏᓐᓂᒃ ᑐᐊᕕᕐᓇᖅᑐᓂᒃ. ᐃᖅᑲᓇᐃᔭᖅᑎᑦᑎᔨᑦ ᐱᑕᖃᖅᑎᑦᑎᔭᕆᐊᖃᖅᐳᑦ ᑐᐊᕕᕐᓇᖅᑐᖅᓯᐅᑎᓂᒃ ᐱᑲᐅᑎᒋᔪᓐᓇᕋᔭᖅᑕᕐᓂᒃ ᖃᐅᔨᒪᑦᑎᐊᕐᓗᒍ ᑐᑭᓯᐅᒪᑦᑎᐊᕐᓗᒍᓗ ᐊᑐᕆᐊᒃᓴᖅ.